လတ်တလောဂျပန်နိုင်ငံအခြေအနေ

အပိုင်း (၁)

အတော်များများကဂျပန်သွားရင်ငွေအများကြီးရှာလို့ရတယ်လို့သာသိကြတာ။
တကယ်လဲ ရပါတယ်။ ကျောင်းသားတောင်မှအချိန်ပိုင်းအလုပ်လုပ်ရင် တိုကျိုမှာဆိုရင်
ယမ်း ၈၅၀ ကနေ ၁၀၀၀ကြား ရတာမို့ မြန်မာငွေနဲ့တွက်ကြည့်ရင် တနာရီ တသောင်းကျပ်ခန့်
ရနေတာမျိုးပါ။ နယ်ဘက်တွေဆိုရင်တော့ တိုကျိုနဲ့ယမ်း၁၀၀ မှ ၂၀၀ကြားကွာဟနိုင်ပါတယ်။

ဂျပန်ခေတ်ကောင်းစဉ်က ဂျပန်လာတဲ့သူတိုင်း စကားတတ်တတ်မတတ်တတ် ပန်းကန်ဆေးလောက်တော့
စလုပ်လို့ရပါတယ်။ အလုပ်မရှားပါဘူး။

ဒါပေမဲ့ ယနေ့ခေတ် ကိုယ်တိုင်ကြုံတွေ့နေရတဲ့ဂျပန်ကတော့ ကမ္ဘာ့စီးပွားဆုတ်ကပ်နဲ့အတူ
ခေတ်ကျပ်ကြီးထဲက ဂျပန်ဖြစ်လို့ နေပါတယ်။ ယခင်ကဆိုရင်ဂျပန်ကုမဏီများရဲ့အမြဲတမ်းဝန်ထမ်းစနစ်ဟာ
သိပ်ကို ကောင်းမွန်ခဲ့တာပါ။ ကုမဏီကြီး(ကော်ပိုရေးရှင်းကြီးများ)ရဲ့အမြဲတမ်းဝန်ထမ်းအဖြစ်ခန့်အပ်ခံရပြီ
ဆိုလျှင် ပင်စင်ယူသည်အထိပူစရာမလိုတော့လောက်အောင် ကုမဏီကြီးတွေဟာဝန်ထမ်းတွေရဲ့လူမှုဘ၀ကို
အစစအရာရာစောင့်ရှောက်ကာကွယ်ပေးနိုင်ခဲ့တဲ့စနစ်မျိုးပါ။

ယနေ့ခေတ်ဂျပန်မှာတော့အလုပ်ချိန်လျှော့တာတွေပေါများလာပြီး
တချို့ကုပ္မဏီများဟာဆိုရင် လပေးဝန်ထမ်းတောင်မခန့်ပဲ အချိန်ပိုင်း(တနာရီလုပ်ခပေးနှုန်းဖြင့်)
ဝန်ထမ်းများကို ခန့်ခြင်းဖြင့် အလုပ်ချိန် တိုးလွယ်လျှော့လွယ် လူလျှော့ဖို့လွယ်သော စနစ်ကို
ကျင့်သုံးနေကြပါတယ်။

ဒါကြောင့်ဂျပန်များကိုယ်တိုင်က ၀င်ငွေသေချာတွက်မရတဲ့ အလုပ်လက်မဲ့လည်းဖြစ်ကောင်းဖြစ်သွားနိုင်တဲ့
ခေတ်ကျပ်ထဲမှာ အသုံးအစွဲတွေချွေတာလာကြပါတယ်။ ဒါကြောင့် မြန်မာအတော်များများ အချိန်ပိုင်းအလုပ်
လုပ်လေ့ရှိတဲ့ စားသောက်ဆိုင် လုပ်ငန်းတွေဟာ ဖြုတ်ပစ်တဲ့ဆိုင်တွေရှိလာသလို လူဝင်နည်းတာကြောင့်
အချိန်လျှော့၊လူလျှော့တာတွေရှိလာပါတယ်။ အလုပ်လဲရှာရခက်လာပါတယ်။

နောက်အကြောင်းချက်တစ်ခုကတော့ အလုပ်လက်မဲ့တွေပေါများလာတဲ့ဂျပန်နိုင်ငံသားတွေကို
အတတ်နိုင်ဆုံး ကာကွယ်စောင့်ရှောက်ဖို့ အစိုးရဟာ အမျိုးမျိုးသော စီမံကိန်းတွေ၊ ပံ့ပိုးရေးအစီစဉ်တွေ
ချမှတ်လာပြီး၊ ယင်းအပြင် နိုင်ငံခြားသားများက ကျူးလွန်သောပြစ်မှုတွေတိုးပွားလာတာကို အကြောင်းပြုပြီး ဂျပန်မှာနေထိုင်သောနိုင်ငံခြားသားများကို လူဝင်မှုကြီးကြပ်ရေးဥပဒေကိုတင်းကျပ်လာခြင်းပဲဖြစ်ပါတယ်။
ဒီလိုတင်းကျပ်လာခြင်းဟာ တရားမ၀င်နေထိုင်သောနိုင်ငံခြားသားတွေကိုသာလျှင်အကျိုးသက်ရောက်စေတာ
မဟုတ်ပါဘူး။ သာဓကအနေဖြင့် ဂျပန်မှာ တရားမ၀င်နေထိုင်သော မြန်မာနိုင်ငံသားအတော်များများဟာ
ဗီဇာရက်လွန်နေထိုင်မှုဖြင့် စစ်ဆေးဖမ်းဆီးခံရပြီး အတော်များများက မြန်မာပြည်ပြန်ခဲ့ကြရပါပြီ။

ယင်းအပြင် ဂျပန်အစိုးရဟာ နိုင်ငံခြားသားများရဲ့ကိုယ်ရေးအချက်လက်ကို ပိုမိုပြည့်စုံစွာ စစ်ဆေးခြေရာခံနိုင်
ဖို့ရာအတွက် နိုင်ငံခြားသားမှတ်ပုံတင်ကဒ်ပြားထုတ်ပေးရေးကို ခရိုင်ရုံးထုတ်ပေးနေခြင်းကို ရပ်ဆိုင်းပြီး
လူဝင်မှုကြီးကြပ်ရေးဌာနက တိုက်ရိုက်ကိုင်တွယ်သွားမဲ့ဥပဒေတရပ်ကိုလည်း အတည်ပြုလိုက်ပါတယ်။
ယင်းအပြင် အခြားစနစ်တရပ်အတည်ပြုမဲခံယူဖို့ရာ လွှတ်တော်တင်သွင်းနေတယ်လို့ ကြားရပြီး မသေချာသေးပေမဲ့ ယင်းစနစ်သာအတည်ဖြစ်လာခဲ့လျှင် နိုင်ငံခြားသားကဒ်အတွင်းမှာ မိုက်ခရိုချစ်ပ်တခု
ထည့်သွင်းထားပြီး စစ်ဆေးလိုက်သောအခါမှာ ကိုယ်ရေးအချက်လက်အပြည့်စုံ ဥပမာ ကျောင်းသားဆိုလျှင်
ကျောင်းတက်ချိန်မှအစ ဖော်ပြပါရှိမယ်လို့ဆိုပါတယ်။ ဒါကြောင့်ကျောင်းချိန်အတွင်း အပြင်ရောက်နေခဲ့လျှင်
တောင် စစ်ဆေးမေးမြန်းခံရမှာဖြစ်ပါတယ်။

အချိန်ပိုင်းအလုပ်များအကြောင်း ဆက်ပါဦးမည်

Posted in: ဂျပန်မှာ